ඇරඹුම...

ටොලමිගේලංකා සිතියම...

 
ශ්‍රී ලංකාව යනු සොබාව සෞන්දර්යයේ අපූර්ව දායාදයක යැයි කීම අතිශෝක්තියක් නොවේ. වසර දෙදහසකටත් වඩ නොනැසී පවතිනා, ප්‍රෞඩ ඉතිහාසයකට හිමිකම් කියනා රටවල් අතලොස්ස අතර ලක්දිවට හිමිවන්නේ ප්‍රමුඛ ස්ථානයකි. ඊටත් වඩා, වර්ග කිලෝමීටර 65000 ක් තරම් කුඩා වපසරියක් තුල මෙතරම් ගවේෂණයට, නැරඹීමට, විඳීමට තරම් ස්ථාන ඇති  රටක් සොයා ගැනීම උගහටය.

විවිධ පුද්ගලයන් හට සංචාරය පිලිබඳ කැමැත්ත ඇති වන්නේ නොයෙකුත් හේතූන් නිසා විය හැකිය. පොත පත පරිශීලනය එසේ බලපාන සාධක අතර ප්‍රමුඛ තැනක ගන්නා බව නිසැකය. කුඩා කල සිටම විවිධ චාරිකා වලට සහභාගී වීමට කැමැත්තක් බ්ලොග් කරුවාට තිබුනද එය ප්‍රබල ලෙස උඩු දුවන්නට හේතු වුයේ එකල වන විට අතේ ඇඟිලි ගණන ටත් වඩා අඩු රචකයන් පිරිසක් සිය ජීවන අත්දැකීම් මුල් කොට ගෙන පල කොට තිබු ප්‍රකාශන නිසාය. .

    "සිංහලයෝ වනාහී දඹදිව මා විසින් දක්නා ලද අන හැම මිනිසුන්ට වඩා යහපත් අය වෙති. භාග්‍ය සම්පන්නද වෙති. ඔවුහු මධුර කථා ඇති අතර ආදරශීලි මනුෂ්‍යයෝය. සින්හලයාගේ ගුණධර්ම සැකවින් වර්ණනාකරතොත් මෙසේය, ඔවුන්ගේ ගමන් ලීලාවද හැසිරීමද ඉතා උදාරය. යම් කිසිවක් වහා තේරුම් ගතහැකි විචක්ශණ ඤාණයක් සින්හලයන්ට ඇත.ඔවුහු ස්භාවයෙන්ම මස් කෑමත්, මත්පැන් බීමත් අප්‍රියකරති.ඔවුහු කිපෙන සුළු නොවෙති. කෝපයක් ඇති වුවත් වහා සංසිදුවාගෙන සමගිවෙති.සින්හලයෝ ඇඳුමෙන් පිරිසුදුය. ඉතා ශිෂ්ඨ ලෙස ආහාර අනුභව කෙරෙති.වැඩිවෙලා නොනිදති.

     සිංහල ස්ත්‍රීන්ගේ හැසිරීම සුවිනීතය. ගමන ඉතා සංවරය.සිංහල ස්ත්‍රීහු අරපරෙස්සමේ ඉතා දක්ෂය.පුරුෂයෝ ස්වකීය භාර්‍යාවන් අතිශයින්ම විශ්වාස කරති.සිංහල ස්වාමිදුව මහේශාක්‍ය වුවත්,දැසිදස්සන් සිටියත්,සියතින්ම සියළුම කටයුතු කීරීමට උනන්දුවෙයි....."

1660-1690 වකවානුවේදී  Robert Knox විසින් රචිත An Historical Relation of the Island ceylon හෙවත් ඩේවිඩ් කරුණාරත්න විසින් හෙල බසට නැගුනු "එදා හෙළදිව" කෘතියේ එකල සිංහලයන් පිළිබඳව සටහන් වන්නේ මේ අයුරිනි.[Download] රොබට් නොක්ස් හට එදා හෙළදිව තුල නැරඹීමට, ගවේෂණය කිරීමට බොහෝ දේ තිබු බව නිසැකය.  ඔහු විසින් තමා දුටු දේ මැනවින් වචන වලට පෙරලා තිබීම එදාටත් වඩා වටින්නේ අදටය.

Village in the Jungle හෙවත් "බැද්දෙගම" යනු ඉංග්‍රීසි ජාතිකයකු විසින් ලාංකික ජන ජීවිතය විවරණය කරනු ලැබූ විශිෂ්ටම කෘතිය යැයි සැලකේ. Leonard Woolf නම් හම්බන්තොට දිසාපතිවරයා විසින් 1908-1911 එනම් මීට සියවසකට පමණ පෙර කැලෑ ගමක් පිලිබඳව ලියා ඇති මෙම කෘතිය කියවන්නෙකුට නිතැතින්ම එකල ලාංකික ජන සමාජයේ සුන්දරත්වය විඳිය හැකිය. Dr. R. Spittle නම් වූ ඉංග්‍රීසි ජාතික වෛද්‍යවරයාගේ Wild Ceylon හෙවත් "වනගත ලංකා" යනු ලාංකීය වැදි ජන සමාජය පිළිබඳව ලියවුනු අගනා කෘතියකි.

බ්‍රිතානය හමුදා නිලධාරියකු හා දක්ෂ වෙඩික්කරුවකු වන Douglas Raffel රුහුණු ජාතික වනෝද්‍යානය තුල ගත කල සත්වසකට අධික කාලය තුල ලබා ගත් අත්දැකීම් සම්භාරය කෘතියකට නගනු ලැබුයේ "IN RUHUNU JUNGLES (CEYLON)" නමිනි. මෙය පසුව සරත්චන්ද්‍ර ජයකොඩි මහතා විසින් "වන සතුන් මැද සත්වසක්" නමින් 1999 දී පමණ සිංහල බසට නැගීය.    

විසිවන සියවසේ මැද භාගය වන විටත් ශ්‍රී ලංකාවේ වනගහනය,සතා සිවුපාවා, ගහ කොළ හා වන වාසි ගැමියා පිලිබදව පොත් රචනා කර තිබු කතුවරුන් බොහොමයක් ඉංග්‍රීසි ජාතිකයින් වීම විශේෂත්වයකි. කෙසේ වුවද පසු කලකදී වන ගමන් හා චාරිකා පිළිබඳව ප්‍රකාශයට පත වූ කෘතීන් කිහිපයක් පිළිබඳව සැකෙවින් විස්තර කිරීමට කැමැත්තෙමි.

සිහල  බසින් ලංකාවේ වනාන්තර, වනවාසී ගැමියා හා ජන ජීවිතය පිලිබඳව ප්‍රථම වරට පල වූයේ "දිගාමඩුල්ලේ ආශ්චර්ය"(1957) නමිනි. මෙහි කතුවරයා පාඨකය හඳුනා ගත්තේ "මායා රංජන්" නමිනි. ඔහු නමින් මහානාම රාජපක්ෂ වන අතර දිගාමඩුල්ල හා දකුණු වැව්ගම් පත්තුවේ ගුරුවරයෙකු ලෙස දසවසරක් පමණ ගැමිදිවියේ සුන්දරත්වය මෙන්ම කටුක බවද එකසේ විඳි අයෙකි. 

    ඇස්.ඩි. ද. ලැනරෝල් මහතා විසින් 1957 වර්ෂයේදී පමණ රචිත "වන නදිය" බොහෝ සෙයින් මා සිත් ගත් කෘතියකි.  බිම්තැන්නේ මහියංගනයෙන් පටන්ගෙන මහවැලි නදිය දිගේ ජල යාත්‍රාවක නැගී ත්‍රිකුණාමලය හෙවත් ගෝණගම්තොට දක්වා ගිය ගමනේදී ඔහු ඇතුළු පිරිස මුහුණ දුන් සිදුවීම් පෙළ මෙම කෘතියට පාදක වී ඇත. මහවැලි ගඟ, වනය පමණක් නොව ගං දැල හා ඒ අවට පිහිටි විවිධ ඵෛතිහාසික ස්ථාන පිලිබඳවද මෙහි මැනවින් විස්තර කොට තිබේ.



පහතින්  දැක්වෙන්නේ වන දිවිය, වන විත්ති හා ජන ජීවිතය පිළිබඳව ලියවුනු කෘතීන් කිහිපයක නාමාවලියකි.

• මගේ රාජ්‍ය (1966), පිටිසර මිනිස්සු - මායා රංජන්
• විසිපස් වසරක වන දිවි තොරතුරු(1982/1986) - තාඹුගල ආනන්දසිරි හිමි
• වනේ ඇඳුනු පියසටහන්(1984), නැවුම් පොලොව (1986), බින්තැන්නේ විත්ති (1988), වන වදුලේ වසන්තය(1988), වනගත චාරිකා(1989).. - පියසේන කහඳගමගේ
• පානම්පත්තුවේ ජන ඇදහිලි හා විශ්වාස, පානම්පත්තුවේ අං කෙලිය,වනගත වීරයෝ (1994) - ගුණසේකර ගුණසෝම
• දඩබිමෙන් දඩබිමට (1993) - දඹානේ ගුණවර්ධන
• බින්තැන්නේ ඇත්තෝ (1997) - සඳරුවන් ලොකුහේවා
• නදීතෙර කුන්චනාදය (1999) - කැමිලස් වනිගසූරිය

(පියසේන කහඳගමගේ/1990 විසින් නදීතෙර කුන්චනාදය සඳහා ලියූ පෙරවදන ඇසුරිනි )

 
     මෑත භාගයේදී එනම් 1997 දී පමණ රොඩ්නි විදානපතිරණ මහතා විසින් ලියූ දුෂ්කර චාරිකා තුලින් කියවෙන්නේ ශ්‍රී ලංකාවේ පහසුවෙන් ලඟාවිය නොහැකි ස්ථාන සොයා ගිය චාරිකා පිළිබඳවය. ඔහු මෙම චාරිකා සඳහා සහභාගී වුයේ තරුණයා පුවත්පතට ලිපි සැපයීමට වුවද, පසුව එම ලිපි එකතුව කොටස් දෙකකින් යුතු කෘතියක් ලෙස නිකුත් විය.

     මෙවැනි  කෘති පරිශීලනය තුලින් ඇති වූ උනන්දුව හා කුතුහලය හේතුකොට ගෙන පසුගිය වසර කීපය තුලදී ලක්දිව විවිධ ස්ථාන වල සංචාරය කිරීමට බ්ලොග් කරුවාට හැකි විය. එසේ ලැබූ අත්දැකීම් පිළිබඳව සටහන් තැබීමට බොහෝ කලක සිට අවශ්‍යතාවය පැවතියද ඊට ඉඩක් නොලැබිණ. පසුගිය හා ඉදිරි චාරිකා අත්දැකීම් පිලිබඳ සටහන් මෙසේ ඇරඹෙන වගයි...